«ҰЛЫ ДАЛА» БАЛАБАҚШАСЫНДАҒЫ ЗАМАНАУИ ЖИ ТАҚЫРЫБЫНДАҒЫ СЕМИНАР

         2026 жылдың 27 наурыз күні Абай облысы, Семей қаласындағы «Ұлы Дала – ИКА» балабақшасында заманауи білім беру үдерісіне арналған маңызды семинар өтті.  Аталған іс-шара балабақша қызметкерлеріне бағытталып, «Жасанды интеллект бағдарламаларымен жұмыс істеудің алғышарт дағдылары» тақырыбын қамтыды.

        Семинарды «Құнанбай қажы атындағы Алаш аудармашылар одағының» атқарушы директоры, курс авторы әрі дәріскер Әбіл-Серік Әбілқасымұлы Әліәкбар жүргізді. Ол өз дәрісінде қазіргі цифрлық дәуірдегі жасанды интеллект мүмкіндіктерін кеңінен таныстырып, педагогтарға практикалық бағыттағы құнды мәліметтер ұсынды.

        Іс-шараның ашылуында «Ұлы Дала – ИКА» ЖШС балабақшасының директоры, «Ауыл» партиясы жанынан құрылған «Бастауыш партия ұйымының» жетекшісі Тұтқышева Айгүл Тілеутайқызы сөз сөйлеп, семинардың маңыздылығына тоқталып, ұйымдастырушыларға сәттілік, ал қатысушыларға нәтижелі жұмыс тіледі.

        Семинар барысында «Веб-контенттік жүйелердің негізгі қызметі», «Веб-аударма құралдары», «Жасанды интеллект бағдарламаларының негіздері» сияқты өзекті тақырыптар қамтылды.

         Қатысушыларға теориялық ақпаратпен қатар тәжірибелік жұмыстар ұсынылып, өзара пікір алмасу алаңы ұйымдастырылды.
Әсіресе, мәтіндік қызметпен жұмыс істеудің алғашқы қадамдарына ерекше көңіл бөлініп, авторлық шолу жасалды. Семинарға қатысушылар өздерін толғандырған сұрақтарын қойып, нақты әрі мазмұнды жауаптар алды.

        Іс-шарада мұндай семинарлардың мектепке дейінгі білім беру ұйымдары үшін маңызы зор екені атап өтіліп, алдағы уақытта да осы бағыттағы оқыту курстарының офлайн және онлайн форматта жалғасатыны айтылды.

        Семинар соңында қоғамдық қор басшысы Омарғалиев Ерік Қайратбекұлы қатысушыларға алғыс білдіріп, шараның тиісінше өз деңгейде өткенін атап өтті. Семинар жиынтық фотосуретке түсумен қорытындыланды.

Асқар Бектұрған,

«Құнанбай қажы атындағы Алаш аудармашылар одағы» ҚҚ мүшесі, журналист.