ҚАЗАҚ ӘЛІПБИІНІҢ АТАСЫ

      Жуырда ауылымыздағы №34 «Бірлік» атындағы ЖОМ-нің  оқу залында, ұлт мақтанышы, көсемсөздің шебері, Алашорда қозғалысының жетекшісі болған көреген саясатшы болған Ахмет Байтұрсыновтың өмір жолы мен шығармашылығына арналған «Қазақ әліпбиінің атасы» атты танымдық кешті ұйымдастырдық.

     Бүл іс-шараның мақсаты – жас буынға ұлт ұстазы саналатын А.Байтұрсыновтың саяси өмірі, шығармашылығы, кітаптары, ғылыми еңбектері туралы құнды деректер беру, ұлы тұлғаның өмірін оқушыларға үлгі ете отырып, оларды өз елін сүюге, оның көркеюіне үлес қосуға тәрбиелеу және олардың танымдық деңгейлерін дамыту болды.

       Танымдық кешті ауылдық округтің әкімі Ләззат Нұртаева мен мектеп директоры Ділмұхаммед Сариев ашып беріп, оқушыларды оқу-білімге шақырып, келешекте өз елдерінің патриоты болумен бірге, жан-жақты білімдар болып өсіп, мемлекетіміздің дамуына А.Байтұрсынов аталары секілді үлкен  үлес қосуға шақырды. Содан кейін оқушыларға ұлы тұлғаның өмір жолы мен шығармашылығы, ғылыми еңбектері, кітаптары туралы құнды деректер айтылды.

      Өз кезегінде мектеп ұстаздары  Айсапар Әбдірайым мен Рая Ешенкулова және 5,6,9-шы сыныптардың оқушылары  – Нурислам Жумаш, Диана Ахмет, Адина Ахмет, Зарина Абдукрам, Айбек Алиев, Нұргелді Балтабай, Нұрлыхан Әбдікерім, Толқын Мұратбек, Балым Болмағанбет, Айжамал Сәрсенбай, Арай Қалжігіт, Інжу Қалмағанбет, Адина Қалмағанбеттер көсемсөз шебері А.Байтұрсыновтың өмір жолын және кітаптарынан үзінділер оқып беріп, өздерінің қаншалықты білімдар екендіктерін көрсетті. Сол үшін олар Алғыс хаттармен марапатталды.

      Іс-шараны аудандық кітапхананың басшысы Гулмира Ақбаева мен оның орынбасары Жанат Зұлыпхарова апайлар қорытындылады. Олар биыл ЮНЕСКО көлемінде 150 жылдығы аталып өтіп жатқан А.Байтұрсыновтың өмір жолы мен шығармашылығына арналған осы шараның жоғары деңгейде өткеніне және оқушылардың белсенділігіне өз ризашылықтарын білдірді.

Бибігүл РЫСПАНОВА,

Қ.Пернебаев ауылдық филиал №8 кітапханасының кітапханашысы.

Бірлік ауылдық округі.