ПОЭЗИЯЛЫҚ БАТЛДА ҚАЗАҚ ТІЛІ ОҚЫТУШЫСЫ ЖҮЛДЕГЕР АТАНДЫ

          Хакім Абай Құнанбайұлының «180 жылдық мерейтойына» орай «Семей қаласының орталықтандырылған кітапхана жүйесі» КММ және «Семей қаласының Мәдениет және тілдерді дамыту бөлімі» ММ-нің қолдауымен «Асыл сөзді іздесең, Абайды оқы ерінбе» тақырыбында поэзиялық батл өтті.

        Рухани мән — маңызы зор бұл әдеби шара, әлемдік ой алыбының мұрасын кеңінен насихаттап, көркемсөз оқу арқылы жастардың шығармашылық қабілетін ұштауға бағытталды. Батл үш кезең бойынша ұйымдастырылды: авторлық арнау өлең оқу, Абай өлеңін заманауи стильде жеткізу және Абай поэзиясынан үзінділердің жалғасын табу. Қатысушылардың сахнадағы шеберлігі мен көркем сөзді жеткізу мәнері жиналған көпшілік көрермендердің ыстық ықыласына бөледі.

           Байқауға түрлі салада қызмет етіп жүрген азаматтық және мемлекеттік қызметкерлер, сондай-ақ әдебиетке жаны жақын жастар қатысты. Абай облысы, Бородулиха ауданындағы «Мемлекеттік және басқа тілдерді оқыту орталығының» қазақ тілі оқытушысы Омарғалиев Ерік Қайратбекұлы шынайы шабытпен, поэтикалық тереңдікпен ерекшеленіп, қатысушылар арасынан суырылып шығып, жүлделі «II орынды» жеңіп алды.

        Жас өнерпазымызды жүлдегер атануымен құттықтаймыз!
Поэзиялық батл соңында, барлық қатысушылар дипломдармен және бағалы сыйлықтармен марапатталды.
Жалынды жастардың жыры ескен бұл тағылымды шара – хакім Абай мұрасына деген құрметтің, жас дарындардың сөз өнеріне деген сүйіспеншілігінің айқын көрінісі болды.
Мерейлі жыл қарсаңында, осындай мазмұнды шаралар өз жалғасын таппақ деген ойдамыз.

Атаева Мейрамгүл Балабайқызы,

Абай облысы, Бородулиха ауданының «Мемлекеттік және басқа тілдерді оқыту орталығының» директоры.