ОҚУ ОРЫНБАСАРЫНЫҢ РӨЛІ – ЗАМАНАУИ МЕКТЕПТІҢ ТІРЕГІ

          Қазіргі заманғы білім беру жүйесінде оқу ісінің меңгерушісі немесе оқу орынбасарының рөлі ерекше. Ол – мектептің оқу-тәрбие жұмысының негізгі қозғалтқыш күші, ұстаздар мен оқушылар арасындағы алтын көпір, сондай-ақ жаңашылдыққа бағыт беретін көшбасшы. Заманауи мектептің тиімді дамуы мен білім сапасының артуы көбіне оқу орынбасарының басқару шеберлігіне тікелей байланысты.

 

        Оқу орынбасары – ұйымдастырушы және үйлестіруші.

Білім беру мекемесінде оқу-тәрбие үдерісінің жүйелі, тиімді ұйымдастырылуы оқу орынбасарына жүктелген. Ол:

• Оқу жоспарымен кестесін әзірлейді;

• Мұғалімдердің оқу жүктемесін үйлестіреді;

• Әдістемелік жұмыстарды ұйымдастырады;

• Оқу мониторингін жүргізеді;

• Білім сапасын жүйелі түрде талдайды.

        Сонымен қатар оқу орынбасары оқу-әдістемелік бірлестіктерге жетекшілік етіп, педагогтердің кәсіби дамуына бағыт береді.

       Көшбасшы ретіндегі рөлі.

        Заманауи оқу орынбасары тек әкімшілік қызметкер ғана емес, сонымен қатар:

• Мотивация беруші,

• серіктес,

• инновацияны енгізуші,

• коуч немесе ментор рөлінде қызмет атқарады.

        Ол педагогикалық ұжыммен серіктестік қарым-қатынас орнатып, бірлескен шешім қабылдауға мүмкіндік туғызады. Өзінің көшбасшылық қабілеті арқылы ұжымда сенімді атмосфера қалыптастырып, ұстаздарды жаңа идеяларға шабыттандырады.

        Инновациялық үдерістерді басқарудағы рөлі.

        Қазіргі мектеп – жаңашылдық алаңы. Осы ретте оқу орынбасары:

• цифрлық білім ресурстарын енгізуге ықпал етеді;

• формативті және критериалды бағалау жүйесін тиімді жүзеге асырады;

• оқытудың жаңа әдіс-тәсілдерін енгізуге жағдай жасайды (мысалы, Lesson Study, STEM, жобалық әдіс және т.б.);

• педагогтердің цифрлық құзыреттілігін арттыру бағытында коучинг, семинарлар ұйымдастырады.

        Қиындықтар мен жауапкершілік.

         Оқу орынбасарының жұмысы үлкен жауапкершілікті талап етеді. Бір мезетте бірнеше бағытты басқару, уақыт тапшылығы, құжаттама көптігі, педагогикалық ұжыммен тіл табысу секілді қиындықтар кездескенімен, бұл қызметтің мәртебесіде, рухани маңызыда жоғары.

        Қорытынды.

        Оқу орынбасары – мектептегі өзгерістердің локомотиві, сапалы білімнің кепілі. Оның біліктілігі мен кәсібилігі – мектептің дамуымен оқушының болашағына тікелей әсер ететін маңызды фактор. Сондықтан оқу орынбасары – жай ұйымдастырушы емес, заманауи мектептің тірегі, жаңашылдықтың жаршысы.

Арыстанов Серик Абдрашович,

Ябек Есенбеков атындағы №59 ЖББМ директорының

бастауыш сыныптар бойынша оқу жұмысы жөніндегі орынбасары.