МӘЖІЛІС ДЕПУТАТЫ АСЫҚАТА КЕНТІНДЕ БОЛДЫ

            Қазақстан Республикасы Парламенті Мәжілісінің депутаты Темір Қырықбаев жұмыс сапарымен ауданға келіп, Асықата кентіндегі бірқатар әлеуметтік және  инфрақұрылымдық нысандардың жұмысымен танысты. Нақты айтар болсақ, «SPORT ASSET MANAGEMENT» қоғамдық бірлестігінің жеке инвестициясы есебінен салынып жатқан заманауи теннис орталығы мен ауыл шаруашылығына маңызды рөл атқаратын «Тәуелсіздіктің 20 жылдығы» каналында болды.

         Ол аумағы 1 гектарды құрайтын және құны 1 миллиард теңгеге бағаланған теннис орталығы – ауданда алғаш рет салынып жатқан ірі спорттық нысанмен танысты. Бір мезетте 200-ге жуық адамды қабылдай алатын бұл кешенде спортшылар үшін барлық жағдай жасалмақ. Жаттығушыларға қолайлы орта қалыптастыру мақсатында:

• 2 жаттығу залы қарастырылған:

  Бірінде – 9 теннис үстелі

  • Екіншісінде – 3 күрес кілемі, бокс рингі, тренажер жабдықтары

• Ерлер мен әйелдерге арналған жеке жатақ блоктары (әрқайсысында 15 орын) орналастырылады.

            Кешеннің құрылысы өткен жылы басталып, биыл пайдалануға беріледі деп жоспарлануда. Орталық іске қосылғаннан кейін республикалық және халықаралық деңгейдегі байрақты бәсекелерді аудан аумағында өткізуге мүмкіндік туады.

          Халық қалаулысы сапар аясында ауыл шаруашылығы саласындағы ең өзекті мәселелердің бірі — ағын су тапшылығына да ерекше көңіл бөлді. Ол Шардара су қоймасынан машиналық әдіспен су көтеруге арналған «Тәуелсіздіктің 20 жылдығы» каналында болып, оның қазіргі жағдайымен танысты.

        Сала мамандарының айтуынша, соңғы жылдарда өңірде ағын судың жетіспеушілігі айқын сезілуде. Әсіресе, биылғы метеожағдай мен климаттық ерекшеліктер ауыл шаруашылығымен айналысатын шаруаларды алаңдатып отыр.

         Мәселенің ушығуына бірнеше себеп бар:

• Тозығы жеткен су тарату арналары уақытылы жөндеуден өтпеген;

• Ағын судың көп бөлігі жерге сіңіп, буланып немесе жерасты суы арқылы тартылып кетуде;

• Нәтижесінде, өнімділік төмендеп, ауыл шаруашылығының тиімділігіне кері әсер етуде.

         Депутат бұл мәселелерді Парламент деңгейінде көтеретінін жеткізді.

           Сапар барысында мәжілісмен жергілікті тұрғындарменде кездесіп, тікелей диалог жүргізді. Инфрақұрылымдық жобаларға мониторинг жасап, «AMANAT» партиясының сайлауалды бағдарламасында көзделген міндеттердің орындалу барысын қарады.