ЖАҚСЫ КЕЛІН — ЖАН ҚҰТЫ

 Аудандық «Жетісай» мәдениет үйінде аудандық аналар кеңесінің ұйымдастыруымен ҚР Тұңғыш Президенті, Елбасы Н.Ә.Назарбаевтың «Болашаққа бағдар: рухани жаңғыру» бағдарламалық мақаласы мен ел Тәуелсіздігінің 30 жылдық мерекесі аясында аудандық «Үлгілі келін – 2021» байқауы болып өтті.
 
Отбасылық құндылықтарды кеңінен насихаттай отырып келіндер арасында қазақы салт-дәстүр, әдет-ғұрыптарды одан әрі жетілдіру, жанұяға деген жауапкершілік сезімін оятып, жас отбасылар арасында ынтымақ-бірлікті нығайту және өнегелі отбасыларындағы үлгілі келіндерді елге дәріптеп, таныту мақсатында ұйымдастырылған өнерлі келіндердің байқауы жоғары деңгейде өтті.
 
Бүгінде ұмыт болып бара жатқан салт-дәстүрлерді қайта жаңғыртып, жас келіндер арасында инабатттылық пен ибалылықты дамыту, үлкенді сыйлау, келін мен қайын сіңлі арасындағы қарым-қатынасты нығайту, ұрпақтар сабақтастығын жалғастыру мақсатында өткен сайыста қатысушылар «Тегін білу – тектілік», «Өнер – өшпес мұра», «Сыр-сандық», «Келіннің кеспесі» және «Дәм-думан» сынды 5 бөлім бойынша өзара мықтыны анықтады.
Алғашқы бөлімде өзін, шыққан тегі мен отбасын, қызметін таныстырған келіндер екінші бөлімде бойларына ананың сүтімен, әкенің қанымен дарыған өнерлерін көпшілікке ұсынып, салт-дәстүрлерге байланысты,  оның ішінде «Тұсау кесер», «Бесікке салу», «Келін түсіру» және «Беташар» сынды көріністер көрсетті, әділ қазылар тарапынан қойылған ситуациялық сұрақтарға жауап берді. Ал, кейінгі бөлімдерде қазақтың ұлттық тағамдарының түрлері мен жасалу жолдары, қонақтың түріне қарай табақ тарту және ұлттық тағамдардың, қазақы сусындардың адам денсаулығына пайдасы жөнінде білімдерімен бөліскен жас келіндер көпшіліктің ықыласына бөленді.
 
Сайыс барысында қатысушылардың дайындығын «Nur Otan» партиясы Жетісай аудандық филиалы төрағасының бірінші орынбасары Әділхан Асауов, аудандық ардагерлер кеңесінің төрағасы Айтбай Махамбетов, аудандық әжелер алқасының төрайымы Айжамал Қоңырбаева, аудандық аналар кеңесінің төрайымы Рахила Басымбекова мен аудандық «Жаңа Жетісай» қоғамдық-саяси газетінің жауапты хатшысы Эльмира Инаятқызы сынды өнегелі отбасы өкілдері бағалады.
 
Жетісай аудандық ішкі саясат бөлімі мен аудандық мәдениет үйінің қолдауымен өткен сайыс соңында қатысушылар арасында көпшіліктің көңілінен тауып, өзгелерден оқ бойы озық шыққан Айдана Дастан бас жүлдені иеленсе, Жайна Балтабай І орынға, Раушан Тайбекова ІІ орынға, ал, Гүлмира Кумекова мен Наргиза Казахова ІІІ орынға табан тіреді.
 
Мұнан да басқа байқаудың «Өнерлі келін – 2021» номинациясына Наргиза Утанова, «Сымбатты келін – 2021» номинациясына Жанар Қыдырша және «Үлгілі келін – 2021» номинациясына Ұлжан Нұрахова ие болды.
 
Жеңімпаз атанғандар мен арнайы номинация иегерлері ұйымдастырушылардың дипломдарымен, аудандық аналар кеңесінің төрайымы Рахила Басымбекованың демеушілігімен қаржылай сыйлықтарымен марапатталды.

Бауыржан НАЙМАНОВ,

Жетісай ауданы.