Ұлт руханиятының алтын арқауына айналған, ғасырлық ой мен зердені бойына жинаған республикалық фольклорлық-этнографиялық әдеби-көркем «Абай» журналы — әр дәуірдің, әр буынның рухани сұранысына жауап беріп келе жатқан тарихи басылым.
Бүгінгі таңда «Абай» журналының оқырман қауымы әр алуан: аға буын зиялылар, ғалымдар мен ұстаздар, қаламгерлер мен өнер адамдары, студент жастар мен жасөспірімдер. Бұл — журналдың өміршеңдігінің, мазмұндық байлығы мен тақырыптық кеңдігінің айқын дәлелі. Әр жастағы оқырман өзіне керегін табатын басылымның қоғамдағы маңызы ешқашан кемімек емес.
Журнал беттерінде ұлттық тарих, әдебиет, мәдениет, фольклор, этнография, тұлғатану, абайтану секілді іргелі тақырыптар қамтылып, ғылыми пайым мен көркем ой тоғысады. Бұл — тек ақпарат беретін емес, ой тәрбиелейтін, рух қалыптастыратын, ұлттық сананы жаңғыртатын басылым.
Қазіргі жаһандану дәуірінде тарихи жадты сақтау, рухани сабақтастықты үзбеу — аса маңызды міндет. Осы тұрғыда «Абай» журналы өткен мен бүгінді, дәстүр мен жаңашылдықты, аға буын тәжірибесі мен жас ұрпақ ізденісін байланыстыратын алтын көпір қызметін атқарып келеді.
Біз үшін әр оқырманның пікірі қымбат, әр қолдауы — жауапкершілік. «Абай» журналы — оқырманымен бірге өсетін, бірге ойланатын, бірге толғанатын рухани орта. Сіздердің қолдауларыңызбен бұл тарихи басылым алдағы уақытта да ұлттық ойдың мінбері, кемел сөздің ордасы бола бермек.
Ұлт рухын ұлықтаған, ой мен парасатты серік еткен «Абай» журналы сіздермен бірге!
Республикалық фольклорлық-этнографиялық әдеби-көркем «Абай» журналының баспасөз қызметі.
