ТАРИХИ ЖӘДІГЕРЛЕРМЕН ТАНЫСТЫ

          Оқушыларымызды өңіріміздің бай тарихымен таныстыру мақсатында біз жуырда Атакенттегі мұражайда болдық. Осы іс-шараның мақсаты – жас буынға Мақтаарал өңірінің тарихи тұлғалары мен тарихи ескерткіштерді оқушыларға таныстыру, осы жерде өмір сүрген ата-бабаларымыздың өмір салты мен олардың арттарында қалдырған еңбектерін нақты көрсетіп, туған жерге, Отанға деген сүйіспеншіліктерін арттыру болды.

       Экскурсия кезінде  оларға – тарихтың бір күнде зерттелетін шаруа еместігі, сондай-ақ заттай деректер мен жазба құжаттардың көмегінсіз тарихты зерттеу де мүмкін еместігі айтылды. Сондықтан тарихшылар көп ізденіп, ежелгі дәуірден сақталған тарихи деректерді мұқият зерттей отырып, адамзат баласының өткен тарихын жазады. Ендеше, адамдардың өткен өміріне қатысты түрлі мәліметтерді «тарихи деректер» деп атаймыз. Өз кезегінде тарихи деректер ауызша, жазбаша, археологиялық, этнографиялық және антропологиялық болып әр түрге бөлінеді. Соның ішінде ауызша және жазбаша деректердің қазақ тарихында алатын орны ерекше. Мұндай деректер қатарына біз ежелден сақталған аңыз-әңгімелерді, эпостық және салт-дәстүр жырларын, шешендік сөздер мен мақал-мәтелдерді жатқызатымыз нақты мысалдармен көрсетілді.

        Оқушыларымыз Атакенттегі мұражайдан түрлі тарихи суреттер, соғыс кезіңіндегі әртүрлі қаруларды көздерімен көріп, соғыс кезінде және одан кейінгі жылдарда өмір сүрген ауданымыздың еңбек ерлерінің ерен еңбектерімен танысты. Солармен танысқан оқушылардың қуанышында шек жоқ, керемет таң қалып, дән риза болды.

Н.ТУРМУРАТОВА,

С.Торайғыров атындағы ЖОМ-ның тарих пәні мұғалімі. Мақтаарал ауданы.