БАҚ ӨКІЛДЕРІ МАРАПАТТАЛДЫ

Бүгін бұқаралық ақпарат құралдары қызметкерлерінің кәсіби мерекесіне орай аудан әкімінің міндетін уақытша атқарушы Асан Маханбетов Жетісай ауданындағы телеарна, басылымдар мен сайттардың журналистері, сала ардагерлерін құттықтап, өңірдің медиа кеңістігін дамытуға қосқан үлестерін ерекше атап өтті.

«Аудандық бұқаралық ақпарат құралдары әрдайым жоғары жауапкершілік және кәсіпқойлықпен ерекшеленеді. Аймақта 1 телеарна, 5 мерзімдік басылым және көпетген ақпараттық портал редакциясы бүгінде заман көшінен қалмай, жаңа медианы меңгеріп, елдікті сақтау, азаттықты баянды ету жолында абыройлы қызмет атқарып келеді. Елді игі іске жұмылдырып, берекені арттырып, татулықты нығайтуда билік пен халық арасында алтын көпір болып жүрген бұқаралық ақпарат құралдарының рөлі қашанда жоғары бағалаймыз. Сіздерге еселі еңбектеріңіз үшін үлкен алғысымды білдіре отырып, баршаңызға мықты денсаулық, отбасыларыңызға амандық, шығармашылық табыс пен шалқар шабыт тілеймін» деді Асан Жақыпбекұлы.

Сондай-ақ, аудандық ардагерлер кеңесінің төрағасы, «Халық үміті» қоғамдық саяси газетінің құрылтайшысы Айтбай Маханбетов пен «SANUR TV» телеарнасының директоры, аудандық мәслихат депутаты Гүлмира Саржанова, аудандық ішкі саясат бөлімінің басшысы Омар Есенбеков журналистиканың маңыздылығына тоқталып, жиналғандарды кәсіби мерекелерімен құттықтады.

Бұдан соң ақпарат саласында елеулі еңбек етіп жүрген бір топ журналистерге түрлі марапаттар табысталды. Атап айтсақ, Тәуелсіздік алған жылдардан бастап баспасөз ісін дамытуға сүбелі үлес қосқан ардагер журналист, Журналистер одағының мүшесі Жолбарыс Тілеуұлына «ҚР еңбек сіңірген журналисті» төсбелгісін тақты. Түркістан облысының қоғамдық даму басқармасының басшысы Аңсар Өсербаевтың арнайы алғыс хатымен «Aqparaqnews.kz» ақпараттық порталының редакторы Бауыржан Найманов пен «Жаңа Жетісай» аудандық қоғамдық саяси газетінің жауапты хатшысы Эльмира Өсербекова марапатталды.

Сонымен қатар, абыройлы міндеттің жауапкершілігін сезініп, өз қызметін мүлтіксіз орындап жүрген бірқатар сала мамандары аудан әкімінің м.у.а Асан Маханбетовтың «Алғыс хатымен» марапатталып, бағалы сыйлықтар табысталды. Аудандық ішкі саясат бөлімінің ұйымдастыруында «28 маусым – Байланыс және ақпарат қызметкерлерінің күні» мерекесіне орай жергілікті БАҚ өкілдері арасындағы үздік журналистік жарияланым байқауының жеңімпаздарына қаржылай сертификаттар табысталды.

Салтанатты шара соңы аудандық мәдениет үйі өнерпаздарының концерттік бағдарламасына ұласып, жиылған көпшілікке мерекелік көңіл-күй сыйлады.

Бауыржан НАЙМАНОВ, Жетісай ауданы.