“ЖЕТІСАЙ АРДАГЕРЛЕРІ” ЖЕҢІМПАЗ АТАНДЫ

            Спорт – денсаулық кепілі. Дені сау адам ғана қоғамның мызғымас, толыққанды мүшесі бола алады.   Сондықтан да болар, адам денсаулығын нығайтып, салауатты өмір салтын дамытуға мемлекет ерекше назар аударып, арнайы бағдарламаларды бекіткен. Бекітілген бағдарламалардың бір бағыты аудандар мен елді мекендерде бұқаралық спортты дамытып, салауатты өмір салтын насихаттау мақсатында түрлі спорттық іс-шаралар өткізумен ұштасады.

              Осыған орай Жетісай аудандық ішкі саясат бөлімінің “Жастар ресурстық орталығы” КММ ұйымдастыруымен “1 наурыз – Алғыс айту күні” аясында ерлер арасында волейболдан ашық біріншілік болып өтті.

              Жетісай ауданының адами әлеуетті дамыту бөліміне қарасты Д.Қонаев атындағы IT мектеп-лицейінде «Жастар салауатты өмірді қолдайды» ұранымен өткен турнирдің ашылу салтанатына аудандық “Жастар ресурстық орталығы” КММ басшысы Нұрлыбек Сағынбекұлы Мутаев пен “Жетісай спорт клубы” КММ директоры Талас Битөреев қатысып, әуе доп шеберлеріне сәттілік тіледі.

           Жоғары дәрежеде ұйымдастырылған байрақты бәсекеде аудан спортшыларымен қатар Алматы, Шымкент қалаларының командалары қатысып, бақтарын сынады.

           10 команда қатысқан турнирдің ақтық ойынына шыққан “Жетісай ардагерлері” мен “Алматы” командаларының ойыны көрермендердің делебесін қоздырды. Іріктеу сындарынан іркілмей шыққан қос команда бір-біріне лайықты ойын үлгісін көрсетіп, жанкүйерлердің ыстық ықыласына бөленді. Десек те, турнир қорытындысымен “1990 жылғылар” құрама командасы ІІІ орынға табан тіресе, “Алматы” құрамасының ойыншылары ІІ орынды иеленді. Ал, өздерінің тәжірибесі мен қабілеттерінің артықшылығын мойындатқан “Жетісай ардагерлері” командасы І орынды иеленіп, турнирдің жеңімпазы атанды.

             Волейболдан өткен аудандық жарыста жеңімпаз атанған командалар мен әдемі ойын өрнегін көрсеткен жекелеген ойыншылар арасынан анықталған үздіктер ұйымдастырушылардың арнайы кубоктары мен қаржылай сыйлықтарына ие болды.

Бауыржан НАЙМАНОВ, Жетісай ауданы.