«Ата Заң – алтын тұғырым» онлайн жыр конкурсы өтті

        Қазақстан Республикасының Конституциясы – елдің ең қастерлі құжаты, халықтың еркін білдіретін, мемлекетіміздің дамуының берік іргетасы. Биыл «Ата Заңымыздың» қабылданғанына 30 жыл толып отыр. Осы айтулы мерекеге орай «Ауыл» партиясының Абай облысы бойынша өңірлік филиалы оқушылар мен студенттер арасында «Ата Заң – алтын тұғырым» атты онлайн жыр конкурсын ұйымдастырды.

          Конкурсқа, мектеп оқушылары мен колледж, жоғары оқу орны студенттері қатысты. Олар, бейнеролик арқылы өздерінің жүрекжарды жырларын жолдап, «Ата Заңға» деген құрметін поэзия тілімен өрнектеді.

         Әрбір қатысушының туындысында елдіктің еңсесі, тәуелсіздіктің қадірі, бірліктің берекесі, бейбітшіліктің құндылығы жырларын бақты. Жастардың шабытты шығармаларынан мемлекетке деген мақтаныш пен болашаққа деген сенім айқын сезіліп тұрды.

         Әділқазылар алқасы әр қатысушының шығармасын тақырыпқа сайлылығы, идеялық-көркемдік деңгейі және орындау мәнері тұрғысынан саралап, өзара үздіктерді анықтады.

       Бас жүлде – елдік рухты айшықтаған ерекше шығармаға ұсынылды;

       І, ІІ, ІІІ орындар – ойлы жырларымен көзге түскен жас қаламгерлерге бұйырды;

       Қалған қатысушыларға «Алғыс хаттар» табысталды.

        Барлық жүлдегерлер арнайы Дипломдармен және естелік сыйлықтармен марапатталды.

         «Ата Заң – алтын тұғырым» онлайн жыр бәйгесі – жастардың шығармашылық әлеуетін шыңдап қана қоймай, олардың бойына патриоттық рух пен азаматтық жауапкершілікті сіңірген тағылымды шара болды.

         «Ата Заңды» қастерлеу – Тәуелсіздікті құрметтеу, әділеттілік пен бірлікті бағалау деген қасиетті де тұмарлы ұғымға саяды.
Осындай жасөркен ұрпақтың жырлары, еліміздің аса бек қымбат құндылықтарын айшықтап, асқақ рухты тағы бір мәрте оятқандай ерек күйге бөледі.

«Ауыл» партиясы Абай облысы бойынша өңірлік филиал баспасөз қызметі.