«ШҮЛЕН ТАРҚАТУ ЖӘНЕ ЖЫЛУ»

         Дін мен дәстүр ажыратуға болмайтын ет пен тырнақ сияқты. Жер бетінде қанша ұлт болса сонша дәстүр бар, әр ұлт өз дәстүрімен ерекшеленеді. Қазақ халқы да дәстүрге бай Халық, деседе аты аталмай ұмыт болып бара жатқан кейбір дәстүрлерімізді қайта жаңғыртып, өскелең ұрпаққа дәріптеп жеткізуіміз біздің басты міндетіміз болып тұр.

       ҚМДБ-ның жұмыс жүргізіп келе жатқан бес бағытының бірі – «Дін мен дәстүр бағыты». Осы бағыт аясында Мақтаарал ауданы, Жамбыл ауыл әкімшілігі Кеңесшіл ауылына қарасты Сейтан ата мешітінің имамы Қоспаев Қажымұхан жамағатпен жүздесіп, тамыры тереңде жатқан игі дәстүрлеріміз «Шүлен тарқату және Жылу» деген тақырыпта ой қозғап, пікірлесті.

       «Шүлен тарқату» дегеніміз, дәулетті кісілердің тұрмыс жағдайы төмен отбасыларға дүние мүлікпен тағы да басқа түрлі тұрмыстық заттармен көмектесіп, қайырымдылық жасауы.

         «Жылу» дегеніміз  үлкен қарызға батып қиналып қалған, үй жайы өртеніп қиыншылыққа тап болған, тағы басқа түрлі осындай басына іс түскен кісілерге ел-жұрт болып қолдан келгенше қаржы жинап көмектесуді айтады. Ислам діні адамзатты әрдайым жақсылыққа шақыратын мейірім діні, жоғарыдағы аталып жатқан дәстүрлеріміздің түпкі мақсаты қиналғанға қол ұшын созып мейірімділік таныту, осы жерде дін мен дәстүріміздің керемет сабақтастығын көреміз.

         Осындай ұмыт болып бара жатқан дәстүрлерімізді қайта жаңғыртып келешек ұрпаққа дәріптеп жеткізу әр біріміздің міндетіміз деп, білейік. Алла Тағала еліміздің аманшылығын жұртымыздың тыныштығын берсін!

Қажымұхан ҚОСПАЕВ, «Сейтан ата» мешітінің имамы.

Жамбыл ауылдық округі, Кеңесшіл ауылы.

.